ye alag baat ki chalte rahe sab se aage
varna dekhā hī nahīñ terī talab se aage
ye mohabbat hai ise dekh tamāshā na banā
mujh se milnā hai to mil hadd-e-adab se aage
ye ajab shahr hai kyā qahr hai ai dil mere
sochtā koī nahīñ ḳhvāb-e-tarab se aage
ab na.e dard pas-e-ashk-e-ravāñ jāgte haiñ
ham ki rote the kisī aur sabab se aage
'shāz' yuuñ hai ki koī pal bhī fusūñ-kār nahīñ
dhyān aate the mire dil meñ ajab se aage