kahāñ din raat meñ rakkhā huā huuñ
ajab hālāt meñ rakkhā huā huuñ
ta.alluq hī nahīñ hai jin se merā
maiñ un ḳhadshāt meñ rakkhā huā huuñ
kabhī aatā nahīñ thā haath apne
ab apne haath meñ rakkhā huā huuñ
zarā bhī rah nahīñ saktā huuñ jin meñ
maiñ un jazbāt meñ rakkhā huā huuñ
jalā.e kis tarah ye dhuup mujh ko
kahīñ barsāt meñ rakkhā huā huuñ
ḳhamoshī kah rahī hai 'shāz' us kī
maiñ us kī baat meñ rakkhā huā huuñ