huā jab jalva-ārā aap kā zauq-e-ḳhud-ārā.ī
tamāshā rah gayā ban kar jahāñ kā har tamāshā.ī
bahāreñ hī huā kartī haiñ tamhīd-e-ḳhizāñ aksar
vahāñ barsoñ rahā mātam jahāñ pal bhar ḳhushī aa.ī
bahar-sūrat qayāmat hai vo aa.eñ yā chale jaa.eñ
jo aa.e to sukūñ chhīnā ga.e to jaan taḌpā.ī
kalī chaTkī na gul mahke na ġhunchoñ par nikhār aayā
ajab andāz se ab ke gulistāñ meñ bahār aa.ī
jahāñ mujh ko nazar aayā koī naqsh-e-qadam un kā
vahīñ ik dam taḌap uTThā mirā zauq-e-jabīñ-sā.ī
ye kyā tarz-e-musāvāt-e-jahāñ hai ādil-e-mutlaq
kahīñ aa.heñ nikaltī haiñ kahīñ bajtī hai shahnā.ī
mirī ḳhalvat meñ lākhoñ ārzūeñ jalva-farmā haiñ
kahīñ mahfil se baḌh kar hai mirī ai 'barq' tanhā.ī