diloñ ko toḌne vaalo ḳhudā kā ḳhauf karo

gire huoñ ko uThā lo ḳhudā kā ḳhauf karo

chamak kar aur baḌhāo na merī siyah-baḳhtī

baḌe gharoñ ke ujālo ḳhudā kā ḳhauf karo

na jaao kār-e-mohabbat meñ chhoḌ kar tanhā

zarā sā haath baTā lo ḳhudā kā ḳhauf karo

hameñ bhī raah dikhā do baḌā añdherā hai

jahāñ meñ raushnī vaalo ḳhudā kā ḳhauf karo

hamārī laġhzish-e-pā par na yuuñ hañso tanzan

ḳhudārā baḌh ke uThā lo ḳhudā kā ḳhauf karo