ek ham hī to nahīñ ābla-pā āvāra
nighat-e-gul bhī huī bād-e-sabā āvāra
ye kahīñ umr-e-guzishta to nahīñ tum to nahīñ
koī phirtā hai sar-e-shahr-e-vafā āvāra
kaun manzil kī ḳhabar de kise manzil kī ḳhabar
rāh-rau ābla-pā rāh-numā āvāra
dil dhaḌaktā hai sar-e-shām ki guzregā abhī
vādi-e-shab se koī naġhma-sarā āvāra
ab koī kis se kahe kaifiyyat-e-zaḳhm-e-bahār
sabza begāna hai gul chup haiñ sabā āvāra