dījiye ruḳhsat-e-bosa nahīñ le baiTheñge

pyāre ye yaad rahe jaan bhī de baiTheñge

pā-e-dīvār khaḌe rahne na diije behtar

aur haT kar tire kūcha meñ pare baiTheñge

be-sar-o-pā haiñ kahāñ jā.eñge juuñ naqsh-e-qadam

ḳhāk-e-pā ham tire qadmoñ hī tale baiTheñge

ātish-e-ishq tire soḳhtagāñ juuñ sho.ala

jab talak haiñ koī ārām liye baiTheñge

rū-ba-rū us ke 'asar' aap ba-īñ-zinda-dilī

kab talak dil ke ta.iiñ maare hue baiTheñge