soch kā ik jaltā sā diyā hai
soyā huā dukh jaag uThā hai
chehra chehra bojh thakan kā
aadhe raste par baiThā hai
gahrī yādoñ kā sūraj bhī
dhīre dhīre Duub chalā hai
aag lagā kar apne ghar kā
koī tamāshā dekh rahā hai
ḳhālī haath aur ḳhālī chehre
paanī rasta DhūñDh rahā hai
kirnoñ kī matvālī fazā meñ
sūraj sā ik thaal gaḌā hai
raste jaate haiñ gaañv ko
shahr ne chehra badal liyā hai
mujh meñ koī bas jaa.e phir
ḳhālī kamra bol rahā hai
duur chaleñ 'maḳhdūm' yahāñ se
ik uḌte panchhī ne kahā hai