ik saañs kī maddham lau to yahī ik pal to yahī ik chhin to yahī

taj do ki barat lo dil to yahī chun lo ki gañvā do din to yahī

larzāñ hai lahū kī ḳhalījoñ meñ pechāñ hai badan kī nasījoñ meñ

ik bujhte hue sho.ale kā safar kuchh din ho agar kuchh din to yahī

bal khaa.e dikhe nazroñ se rise sāñsoñ meñ bahe sochoñ meñ jale

bujhte hue is sho.ale ke jatan hai kuchh bhī agar kuchh din to yahī

maiñ zehn pe apne gahrī shikan maiñ sidq meñ apne bhaTkā huā

in bandhanoñ meñ ik añgḌā.ī manzil hai jo koī kaThin to yahī

is Dhab se ji.eñ sīnoñ ke sharar jhoñkoñ meñ ghuleñ qadroñ meñ tuleñ

kāvish hai koī mushkil to yahī koshish hai koī mumkin to yahī

phir barf girī ik guzrī huī pat-jhaḌ kī bahāreñ yaad aa.iiñ

is rut kī nachant havāoñ meñ haiñ kuchh Tīseñ itnī dukhan to yahī