sadiyoñ se raah taktī huī ghāTiyoñ meñ tum

ik lamha aa ke hans ga.e maiñ DhūñDhtā phirā

in vādiyoñ meñ barf ke chhīñToñ ke saath saath

har sū sharar baras ga.e maiñ DhūñDhtā phirā

rāteñ tarā.iyoñ kī tahoñ meñ luḌhak ga.iiñ

din daldaloñ meñ dhañs ga.e maiñ DhūñDhtā phirā

rāheñ dhueñ se bhar ga.iiñ maiñ muntazir rahā

qarnoñ ke ruḳh jhulas ga.e maiñ DhūñDhtā phirā

tum phir na aa sakoge batānā to thā mujhe

tum duur jā ke bas ga.e maiñ DhūñDhtā phirā