rifāqat kī ye ḳhvāhish kah rahī hai
ka.ī din se vo mujh meñ rah rahī hai
pukārā hai kuchh aise naam merā
ragoñ meñ raushnī sī bah rahī hai
ta.ajjub hai ki merī uñgliyoñ meñ
tirī hāthoñ kī ḳhushbū rah rahī hai
samajh paayā nahīñ par sun rahā huuñ
vo sargoshī meñ kyā kyā kah rahī hai
tirī ḳhvāhish kisī imkāñ kī sūrat
hamesha mujh meñ tah-dar-tah rahī hai
maiñ us kī chhāñv meñ huuñ 'turk' lekin
vo merī dhuup kaise sah rahī hai