āvāz de ke ḳhud ko bulānā paḌā mujhe
apnī madad ko aap hī aanā paḌā mujhe
mujh se tumhāre aks ko kartā thā bad-gumāñ
ā.īna darmiyāñ se haTānā paḌā mujhe
phir is ke ba.ad jur.at-e-girya nahīñ huī
ik ashk ḳhaak se jo uThānā paḌā mujhe
phir yuuñ huā ki jhuuT kī aadat sī ho ga.ī
phir yuuñ huā ki sach ko chhupānā paḌā mujhe
paanī qubūl hī nahīñ kartā thā merī laash
dariyā ko apnā naam batānā paḌā mujhe
mehmān aa gayā thā so khāne kī mez par
jaltā huā charāġh bujhānā paḌā mujhe
dhartī ke zarf kā huā andāza jab 'munīr'
kuchh roz apnā bojh uThānā paḌā mujhe