dil kā khoj na paayā hargiz dekhā khol jo qabroñ ko
jiite jī DhūñDe so paave ḳhabar karo be-ḳhabroñ ko
toshak baalā posh razā.ī hai bhūle majnūñ barsoñ tak
jab dikhlāve zulf sajan kī ban meñ aavte abroñ ko
kāfir nafas har ek kā tarsā zar kuuñ paayā baḳhtoñ siiñ
ātish kī puujā meñ guzrī umr tamām un gabroñ ko
mard jo aajiz ho tan man siiñ kahe ḳhush-āmad bāvar kar
mohtājī kā ḳhāsā hai rubāh kare hai babroñ ko
vaadā chuuk phir aayā 'nājī' dars kī ḳhātir phaḌke mat
chhūT gale tere ai zālim sabr kahāñ be-sabroñ ko