dil le ke burā.ī karte haiñ lo aur suno lo aur suno
phir zikr-e-judā.ī karte haiñ lo aur suno lo aur suno
kabhī dair meñ haiñ kabhī ka.abe meñ kabhī dil meñ haiñ kabhī āñkhoñ meñ
ye but bhī ḳhudā.ī karte haiñ lo aur suno lo aur suno
jo baat bhī karte Darte the kabhī āñkheñ chaar na karte the
vo ham se rukhā.ī karte haiñ lo aur suno lo aur suno
tā-zīst na pūchhī baat kabhī ab aa ke uThā.ī laash mirī
kab va.ada-vafā.ī karte haiñ lo aur suno lo aur suno