maiñ jo kuchh sochtā huuñ ab tumheñ bhī sochnā hogā
jo hogā zindagī kā Dhab tumheñ bhī sochnā hogā
abhī to aañkh ojhal hai magar ḳhurshīd ke hāthoñ
khīñchegī jab ridā-e-shab tumheñ bhī sochnā hogā
muqaddar meñ tumhāre kyuuñ nahīñ likhkhā ba-juz mere
salīb-o-dār kā mansab tumheñ bhī sochnā hogā
ye kaisā qāfila hai jis meñ saare log tanhā haiñ
ye kis barzaḳh meñ haiñ ham sab tumheñ bhī sochnā hogā
ḳhudā aur aadmī donoñ agar ain-e-haqīqat haiñ
haqīqat meñ hai kyā maz.hab tumheñ bhī sochnā hogā