yam-ba-yam phailā huā hai pyaas kā sahrā yahāñ

ik sarāb-e-tishnagī hai mauja-e-sahbā yahāñ

raushnī ke zāviyoñ par munhasir hai zindagī

aap ke bas meñ nahīñ hai aap kā saaya yahāñ

aate aate aañkh tak dil kā lahū paanī huā

kis qadar arzāñ hai apne ḳhuun kā saudā yahāñ

tere mere darmiyāñ haa.il rahī dīvār-e-harf

rakh liyā ik baat ne har baat kā pardā yahāñ

dekhiye to ye jahāñ hai ik jahān-e-āb-o-gil

sochiye to zarre zarre meñ hai ik duniyā yahāñ