kab tak rahūñ maiñ ḳhauf-zada apne aap se
ik din nikal na jā.ūñ zarā apne aap se
jis kī mujhe talāsh thī vo to mujhī meñ thā
kyuuñ aaj tak maiñ duur rahā apne aap se
duniyā ne tujh ko merā muḳhātab samajh liyā
mahv-e-suḳhan thā maiñ to sadā apne aap se
tujh se vafā na kī to kisī se vafā na kī
kis tarah intiqām liyā apne aap se
lauT aa darūn-e-dil se pukāre koī mujhe
duniyā kī aarzū meñ na jā apne aap se