chāñd ne aaj jab ik naam liyā āḳhir-e-shab

dil ne ḳhvāboñ se bahut kaam liyā āḳhir-e-shab

haa.e vo ḳhvāb ki ta.abīr se sarshār bhī thā

us kī āñkhoñ se jo in.aam liyā āḳhir-e-shab

haa.e kyā pyaas thī jab us ke laboñ se maiñ ne

muskurātā huā ik jaam liyā āḳhir-e-shab

maiñ jo girtā bhī to qadmoñ meñ usī ke girtā

us ne ḳhud baḌh ke mujhe thaam liyā āḳhir-e-shab

zindagī bhar kī masāfat kā mudāvā kahiye

us kī bāhoñ meñ jo ārām liyā āḳhir-e-shab