ḳhush-āmdīd kahtā guloñ kā jahān thā

ik dasht-e-be-amāñ magar darmiyān thā

merī barhana pusht thī koḌoñ se sabz o surḳh

gore badan pe us ke bhī niilā nishān thā

kis ḳhema-e-malāl meñ rāteñ basar huiiñ

kis ġham-kade pe mehrbāñ nā-mehrbān thā

raushan alaao hote hī aayā tarañg meñ

vo qissa-go ḳhud apne meñ ik dāstān thā

is samt girya-zārī o kāfūr kī mahak

us samt ḳhush-libāsī thī aur itr-dān thā