sabā banāte haiñ ġhuncha-dahan banāte haiñ

tumhāre vāste kyā kyā suḳhan banāte haiñ

sinān o tiir kī lazzat lahū meñ ram kare hai

ham apne aap ko kis kā hiran banāte haiñ

ye dhaj khilātī hai kyā gul zarā patā to chale

ki ḳhāk-e-pā ko tirī pairahan banāte haiñ

vo gul-izār idhar aa.egā sau dāġhoñ se

ham apne siine ko rashk-e-chaman banāte haiñ

shahīd-e-nāz ġhazab ke hunar-varāñ nikle

lahū ke chhīñToñ se apnā kafan banāte haiñ

tumhārī zaat havāla hai surḳh-rūī kā

tumhāre zikr ko sab shart-e-fan banāte haiñ