ashk girne kī sadā aa.ī hai

bas yahī rāhat-e-goyā.ī hai

sat.h par tiir rahe haiñ din raat

niiñd ik ḳhvāb kī gahrā.ī hai

in parindoñ kā palaT kar aanā

ik taḳhayyul kī pazīrā.ī hai

aks bhī ġhair hai ā.īna bhī

ye tahayyur hai ki tanhā.ī hai

un darīchoñ se ki jo the hī nahīñ

ik udāsī hai ki dar aa.ī hai

dil numūdār huā hai dil meñ

aañkh ik aañkh se bhar aa.ī hai

us kī ā.ankhoñ kī ḳhamoshī 'ādil'

Dūbte vaqt kī goyā.ī hai