ḳhvāhishoñ kī kitāb the jab the
zindagī kā nisāb the jab the
apnī uñglī pakaḌ ke chalte the
ḳhud ko ham dastiyāb the jab the
tāq-e-māzī ke ye udaas diye
shauq meñ āftāb the jab the
apnī āñkhoñ meñ ab khaTakte haiñ
chashm-e-yārāñ kā ḳhvāb the jab the
ab mayassar kahāñ haiñ ḳhud ko bhī
haañ tire be-hisāb the jab the
ye jo āñkheñ bujhī bujhī haiñ naañ
in meñ bhī chand ḳhvāb the jab the
ab jo sūkhe paḌe haiñ qabroñ par
ye bhī taaza gulāb the jab the