aaj maqtal meñ ḳhabar hai ki charāġhāñ hogā
gar ye sach hai to mire qatl kā sāmāñ hogā
aaj kheleñge mire ḳhuun se holī sab log
kitnā rañgīn har ik shaḳhs kā dāmāñ hogā
aaj vo phuul chaḌhā.eñge mirī turbat par
rashk-e-gulzār-e-jināñ marqad-e-vīrāñ hogā
aaj mā.il-ba-tajallī hai jo lailā-e-harīm
qais be-chāra kahīñ sarf-e-bayābāñ hogā
aaj gar bazm-e-suḳhan hai to chalo ham bhī chaleñ
sunñe meñ aayā hai 'betāb' ġhazal-ḳhvāñ hogā