aaj merī palkoñ par qudsiyoñ kā mela hai

ishq terī mahfil meñ dil kahāñ akelā hai

hūreñ terī yādoñ kī jannateñ sajātī haiñ

un se aaj ye kah do zindagī jhamelā hai

ā.īna sañvartā hai un ke dekhe jaane se

rañg-o-nūr kahtā hai raushnī kā relā hai

dard dil ko bhāte haiñ jaane kyuuñ lubhāte haiñ

aañkh ke sitāroñ kā sajtā roz mela hai

zindagī kī rāhoñ meñ zindagī nahīñ miltī

roz-o-shab ke mele meñ jaane kyā jhamelā hai

ishq kī tamannā thī ishq kī tamannā hai

ishq hī kī rāhoñ meñ mastiyoñ kā mela hai

ḳhud-shanās kyā hogā dil agar use DhūñDe

vasl kī tamannā meñ kis qadar jhamelā hai