ye kis adā se chaman se bahār guzrī hai
sulag sulag ke tamannā hazār guzrī hai
hayāt dil kī jo ik shab shumār kar bhī luuñ
vo ek shab hī bahut be-qarār guzrī hai
uḌā ke le jo ga.ī dil kī siskiyāñ bulbul
chaman chaman pe qayāmat hazār guzrī hai
sabā ne chhū jo liyā ḳhushbuoñ ke āñchal ko
jabīn-e-gul pe shikan nāgavār guzrī hai
ye kis maqām pe pahuñchī hai justujū dil kī
visāl rut thī magar sogvār guzrī hai
vafā udaas huī thī fareb khā khā kar
mirī nigāh se guzrī to mushk-bār guzrī hai