qais-e-sahrā-nashīñ se le aao
ishq mujh sā kahīñ se le aao
chāñd kahtā thā āsmānoñ par
nuur merā zamīñ se le aao
un ke nāzuk laboñ ko chhū jaa.e
aisā jhoñkā kahīñ se le aao
raqs kartā rahe jo hoñToñ par
aisā misra kahīñ se le aao
ham manā.eñ to maan jā.eñge
un ko jā kar kahīñ se le aao
ḳhaak jin kī hayāt kā sāmāñ
ek chuTkī unhīñ se le aao
hai tamannā 'ovais' ke sar kī
ek patthar vahīñ se le aao