mire paañv meñ paa.el kī vahī jhankār zinda hai
mohabbat kī kahānī meñ mirā kirdār zinda hai
usī ke naam se har-vaqt merā dil dhaḌaktā hai
maiñ zinda is liye huuñ ki mirā dildār zinda huuñ
jahāñ kal har qadam par muskurāhaT raqs kartī thī
maiñ ḳhush huuñ aaj bhī vo raunaq-e-bāzār zinda hai
yahāñ dekhā hai maiñ ne ḳhud-suroñ ko ḳhaak meñ milte
tirā sar jhuk gayā lekin mirā inkār zinda hai
musavvir ne to saarī dilkashī tasvīr meñ bhar dī
rahegā fan salāmat jab talak fankār zinda hai
mirī tahzīb mere saath hai mahv-e-safar har-dam
mire afkār zinda haiñ mirā iz.hār zinda hai
'iram' par dhuup kā ehsās ġhālib aa nahīñ saktā
mire sar par abhī tak sāya-e-dīvār zinda hai