ġham-e-hayāt ko apnāo zindagī kar lo

ab āñkheñ khol do ik pal ko raushnī kar lo

ġhamoñ ke daur meñ tum ko agar hai ḳhush rahnā

to muskurāo zarā dard meñ kamī kar lo

maiñ is sahāre tamām umr kaaT saktā huuñ

nazar se chhū ke mire ḳhat ko surma.ī kar lo

kise ḳhabar hai ki baaqī hai zindagī kab tak

ye mashvara hai ki ab mujh se dostī kar lo

ik ajnabī se sune maiñ ne tazkire apne

ab is se achchhā hai charchā galī galī kar lo

tum apnī zaat ko mahsūs kar na pāoge

tum apnī zaat se mujh ko agar nafī kar lo

bhaTak rahe ho udāsī ke dasht meñ 'āfāq'

tumheñ ye kis ne kahā thā ki āshiqī kar lo