na milā tirā pata to mujhe log kyā kaheñge
yūñhī dar-ba-dar rahā to mujhe log kyā kaheñge
tujhe zindagī kahā hai tū hai zindagī kā hāsil
tujhe bevafā kahā to mujhe log kyā kaheñge
mire dil meñ zabt-e-ġham kā jo charāġh jal rahā hai
vo charāġh bujh gayā to mujhe log kyā kaheñge
ye jahāñ na jaane kyā kyā mujhe kah rahā hai lekin
kabhī tum ne kuchh kahā to mujhe log kyā kaheñge
maiñ chalā to huuñ sunāne use dāstāñ vafā kī
koī hādisa huā to mujhe log kyā kaheñge