jaise dariyā meñ guhar boltā hai
saat pardoñ meñ hunar boltā hai
terī ḳhāmoshī se dahshat hai ayaañ
terī āvāz meñ Dar boltā hai
jaag auroñ ko jagāne ke liye
bol jis tarah gajar boltā hai
dil kī dhaḌkan se laraztā hai badan
apnī vahshat meñ khañDar boltā hai
ye vahī sā.at-e-bedārī hai
jab duāoñ meñ asar boltā hai
ho gayā rañg-e-suḳhan se zāhir
sher meñ ḳhūn-e-jigar boltā hai