koī nahīñ aatā samjhāne

ab ārām se haiñ dīvāne

tai na hue dil ke vīrāne

thak kar baiTh ga.e dīvāne

majbūrī sab ko hotī hai

milnā ho to laakh bahāne

ban na sakī ahbāb se apnī

vo daanā the ham dīvāne

na.ī na.ī ummīdeñ aa kar

chheḌ rahī haiñ zaḳhm purāne

jalva-e-jānāñ kī tafsīreñ

ek haqīqat laakh fasāne

duniyā bhar kā dard sahā hai

ham ne tere ġham ke bahāne

phir vahshat aa.ī suljhāne

hosh o ḳhirad ke tāne-bāne

phir apne āñchal se havā dī

sho.ala-e-gul ko bād-e-sabā ne

phir vo Daal ga.e dāman meñ

dard kī daulat ġham ke ḳhazāne

aaj phir āñkhoñ meñ phirte haiñ

ahd-e-tamannā ke vīrāne

phir tanhā.ī pūchh rahī hai

kaun aa.e dil ko bahlāne

'saif' vo ġham bhī tishna-e-ḳhūñ hai

ham zinda haiñ jis ke bahāne