chhup chhup ke ab na dekh vafā ke maqām se
guzrā hamārā dard davā ke maqām se
lauT aa.e ham to arz-e-duā ke maqām se
har shai thī past un kī razā ke maqām se
ai mutribān-e-kunj-e-chaman hoshiyār-bāsh
sarsar guzar rahī hai sabā ke maqām se
allāh-re ḳhud-farebī-e-ahl-e-haram ki ab
bande bhī dekhte haiñ ḳhudā ke maqām se
jab dil ne ḳhair-o-shar kī haqīqat ko pā liyā
har jurm thā buland sazā ke maqām se
ai vaa.e 'saif' lazzat-e-nairangī-e-hayāt
mar kar uTheñge bīm-o-rajā ke maqām se