diloñ ko toḌne vaalo tumheñ kisī se kyā
milo to aañkh churā lo tumheñ kisī se kyā
hamārī laġhzish-e-pā kā ḳhayāl kyuuñ hai tumheñ
tum apnī chaal sambhālo tumheñ kisī se kyā
chamak ke aur baḌhāo mirī siyah-baḳhtī
kisī ke ghar ke ujālo tumheñ kisī se kyā
nazar bachā ke guzar jaao merī turbat se
kisī pe ḳhaak na Daalo tumheñ kisī se kyā
mujhe ḳhud apnī nazar meñ banā ke begāna
jahāñ ko apnā banā lo tumheñ kisī se kyā
qarīb-e-naza.a bhī kyuuñ chain le sake koī
naqāb ruḳh se uThā lo tumheñ kisī se kyā