jab tasavvur meñ na pā.eñge tumheñ

phir kahāñ DhūñDne jā.eñge tumheñ

tum ne dīvāna banāyā mujh ko

log afsāna banā.eñge tumheñ

hasrato dekho ye vīrāna-e-dil

is na.e ghar meñ basā.eñge tumheñ

merī vahshat mire ġham ke qisse

log kyā kyā na sunā.eñge tumheñ

aah meñ kitnā asar hotā hai

ye tamāshā bhī dikhā.eñge tumheñ

aaj kyā baat kahī hai tum ne

phir kabhī yaad dilā.eñge tumheñ

'saif' yuuñ chhoḌ chale ho mahfil

jaise vo yaad na ā.eñge tumheñ