chain ab mujh ko tah-e-dām to lene dete
tere fitne kahīñ ārām to lene dete
aap ne is kā taḌapnā bhī gavārā na kiyā
dil-e-muztar se koī kaam to lene dete
maut bhī bas meñ nahīñ hai tire majbūroñ kī
zindagī meñ koī ilzām to lene dete
pal meñ manzil pe uḌā laa.e fanā ke jhoñke
lutf rah rah ke bahar-gām to lene dete
haath bhī terī nigāhoñ ne uThāne na diyā
dil-e-betāb zarā thaam to lene dete
'saif' har baar ishāroñ meñ kiyā us ko ḳhitāb
log us but kā mujhe naam to lene dete