in ā.ankhoñ meñ bin bole bhī mādar-zād taqāzā hai

ḳhvāhish ḳhvāhish bikne vaalā malbūsātī kiiḌā hai

us ke chāroñ or phireñ kyā us ke andar utreñ kyā

apne hī andar utarne kā kyā kuchh kam pachhtāvā hai

sannāTe kī dīvāroñ se sar Takrā kar mar jaao

chīḳhoñ kā zālim darvāza qad se kaafī ūñchā hai

galiyoñ galiyoñ ḳhaak uḌā lī har darvāza jhāñk aa.e

tab jā kar ye ḳhvāboñ jaisā dhuñdlā-pan haath aayā hai

kitne hī chāhe jismoñ kī lāsheñ manzar manzar haiñ

lekin an-gin ḳhushiyoñ kā bhī ā.ankhoñ hī se rishta hai