dar-pesh nahīñ naql-e-makānī ka.ī din se

aa.ī na tabī.at meñ ravānī ka.ī din se

phir ret ke dariyā pe koī pyāsā musāfir

likhtā hai vahī ek kahānī ka.ī din se

dushman kā kināre pe baḌā saḳht hai pahrā

aayā na mire shahr meñ paanī ka.ī din se

sauñpe the kahāñ dhuup ke mausam ko ghane peḌ

maiñ DhūñDh rahā huuñ vo nishānī ka.ī din se

shāyad koī bhaTkā hai vahāñ qāfila 'az.har'

sahrā ne mirī ḳhaak na chhānī ka.ī din se