ek ik saañs meñ sadiyoñ kā safar kāTte haiñ
ḳhauf ke shahr meñ rahte haiñ so Dar kāTte haiñ
pahle bhar lete haiñ kuchh rañg tumhāre us meñ
aur phir ham usī tasvīr kā sar kāTte haiñ
ḳhvāb muTThī meñ liye phirte haiñ sahrā sahrā
ham vahī log haiñ jo dhuup ke par kāTte haiñ
sauñp kar us ko tire dard ke saare mausam
phir usī lamhe ko ham zindagī-bhar kāTte haiñ
tū nahīñ hai to tire shahr kī tasvīr meñ ham
saare vīrāne banā dete haiñ ghar kāTte haiñ
us kī yādoñ ke parindoñ ko uḌā kar 'az.har'
dil se ab dard kā ik ek shajar kāTte haiñ