dil kuchh der machaltā hai phir yādoñ meñ yuuñ kho jaatā hai

jaise koī ziddī bachcha rote rote so jaatā hai

sard havā yā TuuTā taav puurī raat adhūrā chāñd

mere āñgan kī miTTī ko jaane kaun bhigo jaatā hai

ik ik kar ke dhuup ke saare surḳh parinde mar jaate haiñ

ret ke zard samundar par jab sūraj paañv dho jaatā hai

tujh se bichhaḌ kar raat kā ik ik lamha sadiyoñ meñ kaTtā hai

din ke hote hote ab to ek zamāna ho jaatā hai

raat ga.e tanhā.ī mujh se akasr pūchhne aa jaatī hai

chup kī is bastī ko shor-o-ġhul meñ kaun Dubo jaatā hai