sidrat-ul-vasl ke saa.e kā talabgār huuñ maiñ
tapish-e-hijr meñ barsoñ se giraftār huuñ maiñ
jā kisī aur ko jā dhamkiyāñ de mārne kī
jab se maiñ paidā huā tab se sar-e-dār huuñ maiñ
merā paiġhām bhalā teġh kahāñ rokegī
hākim-e-vaqt ko batlāo qalam-kār huuñ maiñ
maiñ ne to rab ko bhī puujā hai aur us yaar ko bhī
vā.izā tū hī batā kis kā gunahgār huuñ maiñ
manzil-e-zīst kahāñ manzil-e-maqsūd 'vaqār'
ik surayyā-e-mohabbat kā talabgār huuñ maiñ