mere hoñToñ kā abhī zahar tire jism meñ hai

tū agar bichhḌā to kyā chain se rah pā.egā

ai suḳhan-fahm mire sher se kyā lagtā hai

kyā mire ba.ad mujhe yaad rakhā jā.egā

maiñ to is shauq meñ hotā huuñ ki kuchh boleñ log

bolnā apnā kabhī rañg to dikhlā.egā

tū jo ab saath nahīñ hai to yahī lagtā hai

ab ḳhudā bhī to mire kaam nahīñ aa.egā

jo bhī kahnā hai yahāñ jhuuT ke andāz meñ kah

sach agar tū ne kabhī bolā to pachhtā.egā