ham ko ma.alūm hai bātoñ kī sadāqat terī

log kyā kyā nahīñ karte haiñ shikāyat terī

malka-e-husn nahīñ phir bhī tū ai jān-e-vafā

achchhī lagtī hai bahut hī mujhe sūrat terī

koī mushkil bhī ho ḳhātir meñ na laate the kabhī

hausla kitnā baḌhātī thī rifāqat terī

tū hī batlā ki bhalā tujh ko bhulā.eñ kyuuñ kar

sāmne āñkhoñ ke aa jaatī hai sūrat terī

kyā kaheñ ham ki guzar jaatī hai dil par kyā kyā

yaad aatī hai jo rah rah ke ināyat terī

log kyā saada haiñ ummīd-e-vafā rakhte haiñ

jaise ma.alūm nahīñ un ko haqīqat terī

ab kahāñ rahtā hai kyā kartā hai 'nādir' mere

muddatoñ ba.ad nazar aatī hai sūrat terī