hamārā zikr dushman kī zabānī dekhte jaao
fasāna ban ga.ī saarī kahānī dekhte jaao
zarā ik chheḌ do zāhid se qisse hūr-o-ġhilmāñ ke
phir us kam-baḳht kī rañgīñ-bayānī dekhte jaao
Tapak le ḳhuun armānoñ kā āñkhoñ se zarā Thahro
mirī luTtī huī rañgīñ javānī dekhte jaao
kamāl-soz ġham-hā-e-nihānī DhūñDne vaalo
ma.āl-e-soz ġham-hā-e-nihānī dekhte jaao
bahut charche the yāroñ meñ mirī jādū-bayānī ke
huzūr-e-dost merī be-zabānī dekhte jaao