aaj phir sar-e-maqtal de ke ḳhud lahū ham ne
teġh-e-dast-e-qātil kī rakh lī aabrū ham ne
jān-e-ġhuncha-o-lāla rūh-e-rañg-o-bū ham ne
aap ko banāyā hai kitnā ḳhūb-rū ham ne
jab bhī lutf-e-sāqī meñ farq aate dekhā hai
baḌh ke toḌ Daale haiñ sāġhar-o-subū ham ne
bārhā zabānoñ par lag ga.ī hai pābandī
bārhā nigāhoñ se kī hai guftugū ham ne
rāh-e-shauq meñ aksar vo bhī vaqt aayā hai
jab kiyā hai hāthoñ se ḳhūn-e-ārzū ham ne
shahr ho bayābāñ ho daar ho ki zindāñ ho
naġhme zindagī hī ke gaa.e chār-sū ham ne