vo rāheñ jin se abhī tak nahīñ guzar merā
lagā huā hai inhīñ rāstoñ ko Dar merā
na jaane kaun thā jis ne mujhe bachāyā hai
mujhe ḳhabar bhī na thī jal rahā thā ghar merā
nahīñ hai bojh mire naam par manāsib kā
maiñ aadmī huuñ ta.āruf hai muḳhtasar merā
gañvā ke zaat ko laayā huuñ zindagī kī ḳhabar
mirī suno ki havāla hai mo'tabar merā
bhaTak rahā huuñ abhī zindagī ke sahrā meñ
ḳhabar nahīñ ki kahāñ ḳhatm ho safar merā