jidhar nazreñ uThā.eñ tīrgī hai
hamārī zindagī kyā zindagī hai
ye manzil hai to ai as.hāb-e-manzil
ye merī ruuh meñ kyā tishnagī hai
ye ġham kī intihā hai yā vafā kī
nazar meñ pyaas hoñToñ par hañsī hai
ye dil meñ dard chamkā yā koī yaad
ye kaisī aag kī sī raushnī hai
ḳhirad kī intihā mujh se na pūchho
jab us kī ibtidā dīvāngī hai
use ḳhatra hai sirf ik fasl-e-gul kā
ḳhizāñ ko kis qadar āsūdgī hai