kaash tūfāñ meñ safīne ko utārā hotā

Duub jaatā bhī to maujoñ ne ubhārā hotā

ham to sāhil kā tasavvur bhī miTā sakte the

lab-e-sāhil se jo halkā sā ishārā hotā

tum hī vāqif na the ādāb-e-jafā se varna

ham ne har zulm ko hañs hañs ke sahārā hotā

ġham to ḳhair apnā muqaddar hai so is kā kyā zikr

zahr bhī ham ko ba-sad-shauq gavārā hotā

bāġhbāñ terī ināyat kā bharam kyuuñ khultā

ek bhī phuul jo gulshan meñ hamārā hotā

tum par asrār-e-fanā rāz-e-baqā khul jaate

tum ne ek baar to yazdāñ ko pukārā hotā