sochte haiñ to kar guzarte haiñ
ham to mañjdhār meñ utarte haiñ
maut se khelte haiñ ham lekin
ġhair kī bandagī se Darte haiñ
jaan apnī to hai hameñ bhī aziiz
phir bhī sho.aloñ pe raqs karte haiñ
dil-figāroñ se pūchh kar dekho
kitnī sadiyoñ meñ ghaav bharte haiñ
jin ko hai indimāl-e-zaḳhm aziiz
āmad-e-fasl-e-gul se Darte haiñ
chhup ke rote haiñ sab kī nazroñ se
jo gila hai vo ḳhud se karte haiñ