asl meñ maut to ḳhushiyoñ kī ghaḌī hai yaaro

zindagī karb hai ashkoñ kī jhaḌī hai yaaro

koī rotā hī nahīñ ġhair kī barbādī par

har bashar ko yahāñ apnī hī paḌī hai yaaro

vaqt aane pe har ik shaḳhs daġhā detā hai

aisā lagtā hai qayāmat kī ghaḌī hai yaaro

apne anjām se ġhāfil na raho fikr karo

maut farmān liye sar pe khaḌī hai yaaro

muskurā kar bhī agar koī kabhī miltā hai

is zamāne meñ yahī baat baḌī hai yaaro

raah chaltoñ ko ye paiġhām 'sahar' detā hai

husn-e-kirdār to jaadū kī chhaḌī hai yaaro