Darā ke mauj o talātum se ham-nashīnoñ ko

yahī to haiñ jo Duboyā kiye safīnoñ ko

sharāb ho hī ga.ī hai ba-qadr-e-paimāna

ba-azm-e-tark nichoḌā jab āstīnoñ ko

jamāl-e-sub.h diyā rū-e-nau-bahār diyā

mirī nigāh bhī detā ḳhudā hasīnoñ ko

hamārī raah meñ aa.e hazār mai-ḳhāne

bhulā sake na magar hosh ke qarīnoñ ko

kabhī nazar bhī uThā.ī na sū-e-bāda-e-nāb

kabhī chaḌhā ga.e pighlā ke ābgīnoñ ko

yahī jahāñ hai jahannam yahī jahāñ firdaus

batāo ālam-e-bālā ke sair-bīnoñ ko

hue haiñ qāfile zulmat kī vādiyoñ meñ ravāñ

charāġh-e-rāh kiye ḳhūñ-chakāñ jabīnoñ ko

tujhe na maane koī tujh ko is se kyā 'majrūh'

chal apnī raah bhaTakne de nukta-chīnoñ ko