yuuñ to aapas meñ bigaḌte haiñ ḳhafā hote haiñ
milne vaale kahīñ ulfat meñ judā hote haiñ
haiñ zamāne meñ ajab chiiz mohabbat vaale
dard ḳhud bante haiñ ḳhud apnī davā hote haiñ
hāl-e-dil mujh se na pūchho mirī nazreñ dekho
raaz dil ke to nigāhoñ se adā hote haiñ
milne ko yuuñ to milā kartī haiñ sab se āñkheñ
dil ke aa jaane ke andāz judā hote haiñ
aise hans hans ke na dekhā karo sab kī jānib
log aisī hī adāoñ pe fidā hote haiñ